Mark 12

Wain Pana Ti Rᵾp Etᵾk Kit Mondrung Ei Nga, Ik Ek

1Wote ei kᵾn, Jisas ik ek ropa nimba mel, “Wu ti ndi, wain pana ti raⱡpa, paⱡa etpa, wain kᵾiya romba ei nga kut tᵾpa tepa, wote rᵾp iting manga ti rukrᵾm. Rakpa mondpa, wu ni, elim kona roⱡ tila manga tᵾma mba etpa, wu mat ndi, kona ei rᵾp indeing nimba ngumba purum. 2Wote, wain poⱡ roⱡnga ranggᵾrmin ui ei urum kᵾn, wu ni ndi, elim nga kindmant wu ti tᵾpa mundpa, wain pana rᵾp etmin wu mbᵾ ndi, wain elim nga mel, mat ranggᵾk ngeing pi nitim. 3Kindmant wu ni, purum mel, kongun rᵾp etᵾng wu nimbᵾ ndi, tᵾmbᵾⱡ ndi rok, ki wai wai mundᵾⱡina, yant urum. 4Wote, kindmant wu ti, ku tᵾpa mundrum ni, i ku etᵾk, pana rᵾp wu mbᵾ, ndi rok peng ei, rok nduk etᵾk, pipil kunduⱡngina, yant urum. 5Wote, aldpa kindmant wu ti, tᵾpa mundrum ni, rok kondrung. Wote, wu minal akil tepa tᵾpa mundrum nimbᵾ, i ku etᵾk, tᵾmbᵾⱡ ndi rok, mat rok kondᵾk etᵾng. 6Wote, ama akil tepa, elim nga kangᵾm tenda aⱡᵾm numan ngurum ni, tᵾpa wain pana rᵾp etᵾng wu nimbᵾ kᵾn, tᵾpa mundᵾmba etpa, ‘Na nga met kang tenda ei, tᵾk ou nduing pᵾnt ei ka!’ nimba tᵾpa mundrum. 7Wote, wain rᵾp etᵾng wu nimbᵾ ndi, en enim nᵾk int yant etᵾk nᵾk mel, ‘Ya onum kang wu ei, kongun kona puⱡ wu ei nga kangᵾm ei, wu onum ei, rop kondpᵾn kᵾn, kona ei, tᵾn ndun puⱡ puⱡ raⱡᵾp tᵾmᵾn!’ nᵾtᵾng. 8I nᵾk, wu ni imp molk, rok kondᵾk, on ni wain pana ᵾldᵾ ila, rok ekit ndurᵾng.

9“Ei kᵾn, wain pana puⱡ wu ei, yant omba, nambuⱡ uⱡ ti etmba?” nimba, Jisas ndi wuldᵾtᵾm. “Wu ei ndi, yant omba, wain pana rᵾp wu mbᵾ, ropa kondpa, wain pana mbᵾ, oi ropa rᵾp wu elpa mat ku tᵾpa ngumba. 10Enim Got nga ik mong ti, ei mel petᵾm ni, kᵾmp rok kandᵾrmin muna mon?

‘Ku ti manga rakpa kᵾni wu mbᵾ ndi, ku kit nᵾk mundᵾk ketᵾng ni, wote omba ku kai rarum. 11Oⱡa nuim ei ndi, uⱡ ei mel elinga, uⱡ ronduⱡ rᵾpndi mat nimp kandᵾrmᵾn!’” nᵾtᵾm.

12Jura rᵾp wu nimbᵾ ndi, Jisas tᵾp imp muⱡmin nᵾk etᵾng. Ei nambuⱡ emel, wu kᵾⱡ pᵾtᵾng ei, ik ek rurum. Ei nga, en enim nga nindpa rᵾrᵾm. Ei nga, pilik popᵾⱡ kulk, tᵾp imp muⱡmin nᵾk etᵾng. Ei wote, wamp minal morung ei nga mundmong etᵾk, Jisas kandᵾk kui elingina purum.

Ku Moni Takis Ti Uⱡ Ei Nga Waldᵾtᵾng

13Wote, Perisi wu mat kᵾn, Erot nga rᵾⱡaip ila wu mat kᵾn, tᵾk mundᵾk polk Jisas waldᵾk ik mat neing, ‘Pᵾi,’ nᵾtᵾng. 14Wote wu nimbᵾ, Jisas murum kona nila ok, nᵾk mel, “Ik mbo wu ye! Tᵾn pitmin ei, nim ik kupa mbᵾ nᵾkᵾn, wamp nuim kurpa mbᵾ nga mundmong iti natkᵾn wamp ei namba nimba pilmba ei nga mundmong iti natkᵾn, wote nim Got nga uⱡ kupa mbᵾ petᵾm ei mel ku nᵾndkᵾn etᵾn. Ei nga, wu mumuk Sisa kᵾn, ku moni takis ngormᵾn uⱡ ei, kapⱡa muna mon? Ku moni wu ei ngamᵾn, muna mon?” nᵾk waldᵾtᵾng. 15Wote, Jisas elim oⱡa tᵾk kᵾning pilik nᵾtᵾng ik ni, mot nga pilpa, int ndupa waldpa nimba mel, “Nambuⱡ emel, enim na kui mel, mil kᵾⱡmin nᵾk enmin? Ku mong ti, mek wangina, na kᵾnamp,” nitim.

16Ku mong ti mek oⱡina, waldpa nimba mel, “Ya kuimp keta ei kᵾn, mbi ei nam nga?” nitim. Ni kᵾn, wamp nimbᵾ nᵾk mel, “Wu mumuk Sisa nga!” nᵾtᵾng.

17Wote, Jisas ndi nimba mel, “Wu mumuk Sisa nga mel ei, Sisa elim ngᵾi! Wote, Got nga mel ei, Got elim ngᵾi!” nitim. Nitim ik ni pilik, wu nimbᵾ, ama min ngᵾn mundrᵾng.

Wamp Kolk Tikil Ruing Ei Nga Waldᵾtᵾng

18Sarusi wu mat, Jisas murum nila orung. (Wu mbᵾ ndi, wamp kormin on etmin mbᵾ, wote ⱡoprᵾk oⱡa muⱡi nᵾmbᵾⱡing nᵾtmin). 19Wu nimbᵾ ndi, nᵾk mel, “Ik mbo wu ye! Tᵾn Moses ndi, mi ik ropa ngurum ei ndi, nimba mel, ‘Wu ti amp mi tᵾpa, wote kangambuⱡa mi nambᵾpa, wangᵾn pepa koⱡum ndam, ᵾngᵾn wu ti ndi, amp wiya ei tᵾpa, ᵾngᵾn wu kurum ei nga kangambuⱡa mindangga,’ nitim. 20Tᵾnggᵾt kᵾn, wu ᵾngᵾnᵾl 7 kat morung kᵾⱡ nga wu ᵾngᵾn komun ei amp tᵾpa kangambuⱡa mi nambᵾpa, wangᵾn pepa kurum. 21Wote, wu ᵾngᵾn merᵾng orunga ei ndi, amp wiya i ku etpa tᵾpa, wote wangᵾn pepa kurum. Wote, wu merᵾng orunga ei ndi, i ku etpa, amp wiya ei titim ei, wote wu ei, i ku etpa wangᵾn pepa kurum. 22Wote, wu ᵾngᵾnᵾl 7 kᵾⱡ nga wu tᵾmbᵾkak morung kᵾⱡ nga wu ti ndi kep, amp wiya titim ei, tᵾpa kangambuⱡa kot kep, mi nambᵾⱡᵾng. Wu kᵾⱡ pᵾkᵾ wangᵾn pek korung. Wote, amp ei, wu kᵾⱡ kolk pora nduⱡina, akil tepa kurum. 23Wu 7 kᵾⱡ ndi, amp wiya tenda ei, tᵾk ambrung ei ka?” nᵾk waldᵾtᵾng. “Wote, wamp kui mbᵾ, ⱡoprᵾk ok pung ui ei kᵾn, amp ei wu nam nga amp mendpᵾⱡ ti ning,” nᵾtᵾng. 24Wote, Jisas ndi, punt ropa nimba mel, “Enim uⱡ ⱡawa mam ei etmin ei? Nambuⱡ emel, ‘Buk Wingti ei kᵾn, Got nga ronduⱡ uⱡ ei kᵾn, pilik kun iti natᵾtmᵾn. 25Wamp kui mbᵾ, ⱡoprᵾk oⱡa moⱡᵾng ei kᵾn, wu amp tᵾk, amp wu puk uⱡ ti, iti nᵾting mon! Wamp mbᵾ, muⱡ kona anggelo mbᵾ mel kapⱡa muⱡing. 26Wote, wamp kui mbᵾ, ⱡoprᵾk ok ping uⱡ ei, Moses nga timan Buk ila, nde kat ndip nurum ei nga puⱡ ila, Got ndi, Moses kundpa nitim ik ni, enim kᵾmp rok kᵾni nakᵾndᵾrmᵾn ei? Buk ila ik mong petᵾm ei ndi, Got ndi, Moses kundpa nimba mel, ‘Na wu Eiparam nga Got, wote wu Aisak nga Got, omba wu Jekop nga Got!’ nᵾtᵾm, 27Ik ei nga puⱡ ei, Got ei wamp kui nga Got ti mon. Got ei, wamp kont molk mint ping ei nga Got ei ka! Enim pilik ⱡawa mundᵾnmᵾn ei ka!” nitim.

Mi Ik Ronduⱡ Ei

28Ni kᵾn, ik mbo wu ti, ik tek rombulk nᵾtᵾng ni, omba kum tepa moⱡpa pitim. Pitim ni kᵾn, Jisas ndi, Sarusi wu ni kᵾⱡ, ik nᵾtᵾng ei, punt ropa kai mundrum. Ni kᵾn, ik mbo wu ni, Jisas waldpa nimba mel, “Mi ik mbᵾ nga mi ik ronduⱡ ei, ik nant ei?” nitim.

29Jisas ndi, punt ropa, “Mi ik ronduⱡ ei ya ei! Kum tᵾiya! Enim Isrel wamp mbᵾ ye! Tᵾn nga Wu Nuim Got ei, wu nuim tenda ei! 30Enim nga Wu Nuim Got ei, enim nga mundmong ei kᵾn, min ei kᵾn, numan ei kᵾn, wote enim nga ronduⱡ ei kᵾn pora numan ngᵾi! 31Mi ik ronduⱡ merᵾng orunga ei ya ei, ‘Enim ndi, en enim numan ngurmᵾn ei mel, enim nga manga keta kup wamp mbᵾ i ku etᵾk, numan ngᵾi!’ Mi ik mbᵾ nga mi ik raⱡ ama ronduⱡ wei raⱡ,” nitim.

32Mi ik mbo wu ni ndi, Jisas kundpa nimba mel, “Ik mbo wu ye! Ei kun nᵾn! Nim nᵾn ik ei kupa, Nuim ei, Got tenda ei, mint morum. Got elpa ti, ei mel muⱡi nambrᵾm mon! 33Wote, wamp mbᵾ ndi, Nuim Got ei, elim nga mundmong ei kᵾn, elim nga numan ei kᵾn, elim nga ronduⱡ ei kᵾn ndi, pᵾkᵾ numan ngangga! Wote elim ndi, el elim numan ngorum ei mel ku, elim nga manga keta kup wamp mbᵾ, i ku etpa numan ngangga! Kng mel mbᵾ, kalk tindiⱡim mundᵾrmᵾn uⱡ ni nga ronduⱡ ti mon. Ya mi ik raⱡ ama ronduⱡ wei raⱡ!” nitim. 34Jisas ni, wu ni pilpa kungᵾndi uⱡ nga ik ei pilpa, punt ropa nimba mel, “Nim, Got nga wamp tᵾpa mumuk rui uⱡ ei nga rukᵾr uin. Uⱡ ei nga, roⱡ etᵾk muⱡi nambrᵾn!” nitim. Wote ei kᵾn, wamp ti ndi, Jisas ik mat wulding ei nga mundmong etᵾng.

Kraist Ei, Wu Nam Nᵾk Waldᵾtᵾng

35Jisas ndi, manga wingti ou ila, wamp ik mbo endpa, moⱡpa mel wamp mbᵾ, waldpa nimba mel, “Mi ik mbo wu kᵾⱡ ndi, Kraist ei, Depit nga pundᵾn ei, namba etᵾk kandᵾk ninmin?” nitim.

36“Muⱡnga Wingti ei ndi, Depit kᵾn omba moⱡpa nimba mel, ‘Nuim ei ndi, na nga Nuim ei kundpa, na nga ki mbo orunga okᵾn muⱡi! Wote na ndi, nim nga el rui wamp mbᵾ tᵾp, nim nga kᵾmp mana orunga wᵾl nduimp,’” nitim.
37“Depit elim ndi, Kraist ei mbi tepa, ‘Nuim ei!’ nitim. Wote ei nga, namba etpa Depit nga pundᵾn ila, Kraist omba?” Wamp nimbᵾ, Jisas nga nitim ik nimbᵾ, pilik kai pᵾtᵾng.

Jisas Ndi, Mi Ik Mbo Wu Kᵾⱡ Nga Pilik Kongundᵾk Muⱡᵾi!

38Wote wamp nimbᵾ, ik mbo endpa nimba mel, “Enim mi ik mbo wu kᵾⱡ nga pilik kongundᵾk muⱡᵾi! Wu mbᵾ ndi, en enim nga kᵾng orunga mint paka rok, muⱡ mbal kai ruⱡ mbᵾ mint ralk, mel rarᵾp kona na mbila, wamp kel mbᵾ ndi, en enim rawe etᵾk, tᵾk ou ndeing nᵾk pᵾtmᵾn. 39Wote, manga wingti kel mbila, nde pol kuimbal muⱡmin nᵾk pᵾtmᵾn. Wote, rᵾng koik etmin kona mbila, kona kurung orunga kai tetᵾm mbila mint mormᵾn. 40Atinga ruⱡ etᵾk rok, wamp ndi, kandᵾk neing nᵾk, amp wiya mbᵾ etᵾk rok, mang kona mel mbᵾ kindᵾp nok etmin. Wu kᵾⱡ i etmin uⱡ ei nga, mindil mam ti ting!” nitim.

Amp Wiya Ti Nga Angge Ku Moni Ngurum

41Wote Jisas ni, manga wingti ou ila, angge ku moni ngormᵾn kona nila moⱡpa, wamp ku moni mundrᵾng ei mel kᵾndrᵾm. Mel pi wamp nimbᵾ ndi, ku moni ou nduk mundᵾⱡina mel, amp wiya ti omba, ku peni kui raⱡ etpa ropa, mana ndurum. Ku peni raⱡ tᵾpa rak ndupa, ku peni ku tenda mel. 43Wote, elim nga kitip kᵾni wu ni kᵾⱡ, wi ropa rukᵾr tᵾpa nimba mel, “Na enim ik kupa ei kundᵾp nᵾnt. Ya amp wiya kurpa ni ndi, ku moni ou ndupa ngum. Wote, wamp mat nimbᵾ, tᵾpa mana ndupa, ya angge ku moni wal ila mundnum. 44Wote, wamp mat nimbᵾ, en enim nga kng orunga mel, ou ndupa nimbᵾ nga nit kakina mbᵾ ngᵾng. Wote, ya amp ei, elim kurpa norum ei mel ku, elim nga tepa moⱡum mel mbᵾ, pᵾi ngum. Amp ei, elim nga ngumba pendpa moⱡum mel waⱡᵾm ei, pᵾi ngum,” nitim.